Kuždy tyžeń pśiźo nowe wudaśe Nowego Casnika ku mnjo, młogi raz jo zajmna lektira, drugi raz se njestaram wó někotarich wobrazow kokotow, majskich bomow, a tak dalej. Politiske pśinoski mam za nejzajmnjejšy, lěcrownož njejsu tak cesto.
Ale něnto som musał pitśku se źiwaś, ako som lazował artikel na drugem boce aktualnego wudaśa (NC 02/2025, 09.01.).
Tam wopisujo Horst Adam zgromaźina měsćańskich wótpósłańcow a až jo něco wótgłosowała. Nowosći pak som musał dłujko pytaś a som namakał akle w šestem wótstawku.
Górjej: Mě se zda, až artikel jo bejnje jadnobocny abo nanejmjenjej se pśichylony.
Lěcrownož zaźaržanje AfD dlej a wěcej se wujasnjujo, lazowarje njezgnóniju, cogodla druge frakcije se mysle, až toš ten kśac jo notne: Wšykne šule muse pśidatne wukniki pśiwześ. NC groni dwěju cłonkoju AfDa z mjenim, kótarejž stej byłej wuknika DSGa a togodla stej pśeśiwo toś ten plan.
Snaź zajmne, ale co jo z tymi drugimi frakcijami? Njamaju tež absolwenty mjazy sobu? Co wóni se mysle? Lěwica jo howac pśecej za Serbow angažěrujo, pišo kněz Adam, ale weto jo ten plan pódpěra. Cogodla ten raz nic? Ja by rad lazował. Jano Ulli Wünsch (AfD) jo direktnje citěrowane. Až wón ma doktora a AfD ma dwa gójca – za co jo to wažny?
Te druge partaje njekrydnu samske wobchadanje. Zawěsće: Te druge njejsu se wugronili. Wót kuždego casnika pak wótcakujom, až wěcy zarědujo a teke kontekst dajo.
Mimo togo: Jo to pópšawem wjeliki problem za móju staru šulu a cogodla? Ja by rad lazował, co wjednik abo wukniki gronje. Město togo by mógali ceły prědny wóstawk wušmarnuś, tam źo normalnje wótcakam nowosći w casniku.
Na wšom slědku som tužny, až pšawicaŕska partaja jo normalita a njejo trjeba, to pomjeniś.
Su śišćali toś ten pśinosk (NC 03/25), kótaryž som pósłał ako krotšy lazowarski list do Casnika. Wótegrona pśiśeł pózdźej how w NC 04/25.
Image by Andrys Stienstra from Pixabay
